impromptuz

朝早十點幾，無來電顯示。

「點？」又係廣告電話啦。

「早晨呀！我地呢度係電台示愛節目打嚟架，我地依家online有一位暗戀咗你兩年嘅女仔想同你表白喎～」

「下？」唔係呀？一早搞d咁嘅野。

「有冇頭緒先？不如比你估下？」

呢個時候我腦裏面出現咗好幾個人名。
但邊個會咁無聊做d咁嘅野？咪玩啦。

「唔。。ehhh Melody?」

「唔係。再估？」

「Stephanie？Tiffany？Isabella？」

「。。。咁，不如我等你地兩個自己講。」

______

「喂？」

「喂。。老闆」

呢個時候，我先留意到，

原來坐係我房出面嘅你，

一直拎住部電話望住我。

---

<時間關係，極速完結篇>

女秘書放低電話，cut咗線。

老闆都cut咗線，依然係「唔係呀？一早搞d咁嘅野」嘅心情。

秘書突然企起身，眼泛淚光慢慢行入老闆間房。

老闆同秘書講，唉你冷靜d先，刪咗度門，有d咩坐低慢慢講。

老闆行去窗邊，飲咗啖齋啡，一邊望住德輔道中嘅電車來來往往，一邊聽下秘書有咩講。

秘書搾實張tissue，一口氣講唒呢兩年嚟嘅辛酸。就算明知老闆身邊有Melody、Kitty、Tiffany，秘書依然冇變過心，仲話每一日可以見到老闆，睇到老闆係度飲自己沖嘅咖啡，已經好滿足。我知，我只係一個完全唔吸引嘅小秘書，但其實我都會希望有奇蹟出現，所以，所以我先做埋呢d傻事，對唔住老闆，令你難做。

可能仲有d hangover，聽聽下秘書嘅獨白，老闆呢個時候唔知點解都有d感動。望到秘書個樣咁陰公，呢兩年又的確都盡心盡力幫自己做野，一時衝動下，就係秘書嘅背後攬住佢，係佢耳邊溫柔講咗一句：「多謝你嘅好意。明架啦。」秘書喊得仲犀利。老闆見到秘書情緒仲未平復到，就話不如今日返屋企休息下先，你住邊？我車你返去。

但係，老闆實在太大意啦。皆因佢間房係有落地玻璃窗架。竟然有路人影咗video仲upload咗上100毛，係一日內成萬三個like，千六個share，突然受全城恥笑。

管理層對於呢件事大為關注，最後一致決定勸諭秘書離職。悲哀嘅係，呢個老闆竟然完全冇挽留佢嘅意欲，end up 連眼神接觸都免得就免。

秘書離職後，日日係屋企日諗夜諗，最後因愛成恨，癲咗。而老闆就繼續佢風流快活嘅生活。

某一個星期四嘅夜晚，雲咸街。秘書走咗去老闆最中意去嘅個間bar，見到老闆同Melody係度咬耳仔。

於是秘書鼓起勇氣走上前，一刀殺咗個老闆。

－完－