悲歌：香港納米樓的副產品

香港發展商近年不斷推出極不人道的「納米樓」，面積僅有一個停車位般大。所謂「studio」單位，意思就是床一邊是馬桶，床另一邊就是洗衣機。所謂「煮食空間」，即一個電磁爐加一個蚊型雪櫃。所謂「衣櫃」，就是一個最多可放置幾件大衣的櫃子。為了減省空間，洗手盤乾脆就放在企缸入面，乾濕廁所合一。看看人家芬蘭瑞典的監獄比我城的住宅更為寬闊豪華，可謂悲哀至極。

可惜，在瘋狂的樓市下各種奇形怪狀的住宅產品都有價有市，也同時出現了很多「蝸居」的by products。

1）迷你倉/boxful — 在歐美，雜物放在車房/basement/閣樓就可以了。在蝸居，冬季和夏季的衣服大概也要分開存取。

2) 可變身/對摺/多用途/小巧的傢俱 — 就好似周星馳入面d發明咁，好多機關（睇落係一隻鞋，其實一個風筒咁樣嘅設計 XD）例如，必備梳化床、吃飯先會反出嚟嘅飯檯、可以用嚟放埋吸塵機嘅凳、連天皇按摩椅都要出小巧迷你型嚟cater返呢d flat size。

3）以升高地台、小閣樓（如樓底高），窗台用盡每一寸空間，包括平面area以及airspace。例如窗台用嚟做書檯或床嘅一部分。

4) party room / coffee shop / 會所function room – 依家越來越多party room 可供租借, 咁都冇辦法，150呎嘅屋又點可以邀請朋友嚟開party?! 開張麻將檯都冇位啦 /_\

5) 小朋友 室內playroom / 小朋友親子遊樂場餐廳 – 屋企連比小朋友爬嚟爬去嘅地方都冇。市面上就開始湧現呢d 大面積嘅小朋友playroom。以我所知，租金便宜嘅石門就有好多啦。（咁多小朋友玩係唔衛生架啦，咁冇辦法啦）

6) 自助洗衣店 – 冇洗衣機冇位曬衣服，自助洗衣店成為好多劏房戶/納米樓業主嘅蒲點。

其實面對住樓價 & 租金高企 (both 住宅和商業地產），香港都開始有好多co-living space / co-working space / co-retail space (格仔舖) 嘅出現。美其言就係有community呀，synergy呀，其實咪又係因為太貴租😅